AUMMA AUMMA AMUNINNI, di Peppe Fontana

Di stu munnu senza cchiù funnu

amuninni di sti chiazzi

di genti vacanti

servi di politicanti pagghiazzi

emu avanti !

un perdemu tempu girammu ntunnu

Aumma Aumma Amuninni

senz’aspittari l’ordine di nuddru

un’avi mpurtanza dunni

li peri, la testa nostri sunnu

amunì appresso li nostri sonni

semu omini ! quatrati o tunni

luttamu pii amuri e libertà

chissi sù li nostri bisogni

no culi e minni di plastica

di sta tristi e cretina realtà

Aumma Aumma Amuninni

cu un fucili mmanu

nta ogni trazzera e locu 

dunniccè un focu

e un lamentu di un cristianu

sparamu a sta notti scura

lassannu un signali nceli

pii li stiddi di dumani

pii la luci di li nostri criatura

Aumma Aumma Amuninni

dunni agghiorna l’amuri

senza mura, senza spini

cu lu suli nta lu cori

pii una vita chi mai mori

emu avanti !

luntanu di sta muffa, di stu nenti

tra la genti cu sintimenti

manu manu vulero moriri cuntenti

manu manu aumma aumma

nta tutti li continenti

pii sta primavera chi è na bumma

pii dittatura e pripotenti

chi c’avannu a fari li cunta

           Peppe Fontana